შუახნის მოხელე ჰოდკოლიოსინს მაჭანკალი ქალი ვაჭრის ქალიშვილზე, აგაფიაზე დაქორწინებას სთავაზობს. ჰოდკოლიოსინს თითქოსდა სურს აგაფიაზე დაქორწინება, მაგრამ ამავე დროს ფეხს ითრევს. საქმეში ერთვება მოხელის მეგობარი, ვინმე კოჩკარიოვი. ეს დაუდეგარი ხასიათის კაცი იმდენს მოახერხებს, რომ მრავალრიცხოვან სასიძოებს ჩამოაშორებს აგაფიას და საპატარძლოს ჰოდკოლიოსინის სასიკეთოდ განაწყობს.
საქმე გაჩარხულია – აგაფიაც თანახმაა ქორწინებაზე და ჰოდკოლიოსინიც, მაგრამ გადამწყვეტ ჟამს...
მართლაც რომ დაუჯერებელი ამბავი ხდება ფინალში.

"მსუქანი ბიჭი ნატურმორტში" - ბავშვობაში დაობლებული, ორმოც წელს მიტანებული კაცის სევდიანი კომედია, ვისაც გამზრდელმა დეიდებმა მეძავი "გაურიგეს" . . . 

რა ბედი ეწევა "ბეღურას" (დეიდები ჯერ კიდევ ამ მეტსახელით უხმობენ თავის დიშვილს), რომელსაც თავდავიწყებით შეუყვარდა . . . რა ბედი ეწევათ მზრუნველ დეიდებს და ერთ ჩვეულებრივ მეძავს? - ამაზე გვიამბობს თანამედროვე რუმინელი დრამატურგი, რეჟისორი და მსახიობი, იონ საპდარუ, რომელიც თავის გახმაურებლ პიესას წარმოგვიდგენს ბათუმის "ახალ სცენაზე"

ლეგენდარული შვედი რეჟისორის, ინგმარ ბერგმანის კინოსცენარი „ჩურჩული და კივილი“ ონკოლოგიური სენით შეპყრობილ აგნესზე და მის ირგვლივ მყოფ ნათესავებზეა. ამბავი იმაზე, თუ რა ხდება მაშინ, როდესაც სიკვდილი შვება უფროა ვიდრე უბედურება, როცა სიცოცხლეზე კონტროლს კარგავ და სიკვდილს როგორც გამოსავალს ისე ელოდები. სატანჯველი იმდენად დიდი და უსასურულოა, რომ ირგვლივ მყოფები გრძნობებს ვეღარ იმორჩილებენ და ერთმანეთთან გაუცხოვების მიზეზების ძებნას იწყებენ. არსებობს თუ არა დებს შორის სიყვარულის ხელახლა შობის იმედი? რამდენად დიდი ტანჯვაა მათთვის სხვისი სატანჯველი და რა დრო სჭირდება სიძულვილს თანაგრძნობის ჩასანაცვლებლად.

არის დებზე, რომლებიც ერთმანეთის სიყვარულს გადაეჩვივნენ, მათ ქმრებზე და კიდევ ანაზე, რომელმაც ვერაფრით ვერ შეძლო თავისი ქალბატონისთვის ეღალატა.

ემილ ზოლას ნაწარმოები მძაფრი დრამაა, რომელიც ერთი ოჯახის ფონზე ვითარდება. ქალბატონი თავის ავადმყოფ ვაჟს ოჯახში შეხიზნულ, უთვისტომო ქალიშვილზე დააქორწინებს. ახალგაზრდა ქალი სიცოცხლესა და ქალურ ბედნიერებას ელტვის. როგორც ასეთ დროს ხდება ხოლმე, "საჭირო" დროს აუცილებლად ჩნდება "საჭირო" მამაკაცი. ამჯერადაც ასე მოხდება. შეყვარებული წყვილი ავადმყოფის თავიდან მოცილებას გადაწყვეტს და თავის მიზანს განახორციელებს კიდეც. რა სასჯელს გაუმზადებს მათ განგება?

თანამედროვე პოლონელი დრამატურგის, ინგმარ ვილკვისტის ორ პერსონაჟს შორის გათამაშებული მძაფრი დრამა ბათუმის სახელმწიფო დრამატული თეატრის სამხატვრო ხელმძღვანელმა, ანდრო ენუქიძემ ქართულ სინამდვილეს მოარგო. „ბონდოს ღამე“ ჩვენს უახლოეს წარსულზე გვიამბობს უაღრესად მტკივნეულ, ადამიანური ვნებებით დამუხტულ, დამაფიქრებელ ისტორიას ცოდვა-მადლზე, ბრბოს სისასტიკესა და მსხვერპლზე... 

რეჟისორი ზაზა სიხარულიძე გახმაურებული ამერიკული ფილმის „ღამის პორტიე“-ს სცენურ ვერსიას სთავაზობს მაყურებელს, რაც, უპირველეს ყოვლისა, თავისი თემატური არჩევანითაა საინტერესოცა და ნიშანდობლივიც. ფაშისტური რეჟიმი, საკონცენტრაციო ბანაკი და იქ, იმ კოშმარში, ჯალათსა და თავის მსხვერპლს შორის წვეული სიყვარული. რა განვითარებას პოულობს ეს ამბავი წლების შემდეგ, როგორ იცვლებიან, თუ არ იცვლებიან ამ ისტორიის მთავარი გმირები, რა განაჩენი გამოუტანა იატაკქვეშეთში გადანაცვლებულმა რეჟიმმა შეყვარებულ წყვილს?..